-La primer vegada que tuve en Porcía (conceyu d'El Franco) foi a la fin de los años 80 na "Noite Celta", que sigue faciéndose dende hai 30 años el caberu sábadu d'agostu.
Dende esa fecha, vuelvo ellí tolos años que se m'arregla. Los primeros años díbemos nel Alsa, un llargu viaxe de casi cuatro hores dende Xixón, qu'anguaño faise n'hora y media de coche y dormíemos col sacu na carbayera qu'arrodia'l práu de la fiesta. Col tiempu, volví como músicu con "Felpeyu", seique ocho veces y otru par d'elles con "Los Ciquitrinos". Tamién col tiempu fui faciendo bones amistades nel conceyu d'El Franco y nel conceyu vecín de Tapia. Tamién Charo Borreguero tien perbones alcordances y amistades del añu que tuvo de profesora nel institutu d'A Veiga.
Asina que cuando la nuestra collacia Graciela nos propunxo facer una presentación n'El Fornello, (chigre y centru cultural de referencia na zona), perbien rexentáu por Bárbara Suárez, nun lo duldamos nin un momentu. Graciela y Nana, preparáronnos un escenariu propiu d'una casa cultura, con proyector, pantalla y megafonía.
Perellí pasaron munches de les persones qu'activen social y culturalmente la zona, Pepe'l del Polo (de la Noite Celta de Porcía), Iván de Cazarón (del Parque Histórico del Navia), xente de la plataforma "Oro No", artesanos, actores, profesores, ganaderos, agricultores...
Sedría llargo de nomar a tola xente que tuvo ellí.
Sabíemos que Porcía nun diba fallanos y nun nos falló.
Gracies fonderes a tolos qu'ellí tuvistis por acoyenos otra vegada como en casa.
Déxovos equí unes semeyes del collaciu Germán Yanes, pa ilustrar esos bonos momentos.
 |
| Dedicando llibros n'El Fornello, Porcía © Germán Yanes |
 |
| Dedicando llibros n'El Fornello, Porcía © Germán Yanes |
 |
| Ruma y Charo n'El Fornello, Porcía © Germán Yanes |
